isle-bourbon

PARLEZ FRANCAIS

Ti créole

Dès qu ti rent' l'école

Premié zaffaire y dit à toué :

Parlez Français.

          Ec ton papa, ec ton moman

          Créole ton sèle causement !

          Ec marmaille comme toué

          Quand zot y zoué

          Ec ton patois

          Toué cé lo roi.

Voilà zordi y dit à toué :

Parlez Français !

Ti créole

Toué lé pris dans la colle.

          Toué lé pas bitié, ton bouce y moque

          Ton front y frise

          Ton zié y plisse

          La pas loin ti deviens toc-toc

          Encore un pé

          Toué pou pléré

Lo Maît' la commandé

Parlez Français

Ti créole

Toué le pris dans la colle

          Ti comprends pas quoça li vé

          Alors ton bouce y res' fermé

          Ton zié y commence voilé

          Ti fouille patate dans ton nez

           Lo maît' y grogne

          Tention li cogne

Laisse pas ti créole

Dans la colle

Laisse à li dit son dé mots

Li s'ra pas Victor Higo

Et pi après ?

Li s'ra Rénioné !

Ti Flère la Misère, 1980

Daniel Honoré